依家市道咁差，唔少人揾工揾到懷疑人生。喺Threads上面，有網民分享自己喺職場嘅無奈，講到明知道份工伏，但依家咁嘅環境，有工做都要感恩。
佢話：「睇得Threads多，就會見到成日都有人講經濟唔好、裁員多，揾到工都好難，唔好亂辭職。好多人等咗半年、一年都未搵到新工，就算搵到都可能要cut人工。就算有opening，都係啲伏工，分分鐘要一個人做兩個人份量，轉工都可能係由一個地獄跳去另一個地獄。」
佢又提到，自己曾經畀老細鬧：「唔係咁做嫁，係你唔識做，你死蠢。」回頭一諗，雖然當時好辛苦，但依家再睇，其實仲有工捱、仲有人鬧你，喺呢個大環境下，係咪真係要覺得慶幸？
下面有唔少網民留言，有人話永遠唔好被市道嚇親，逆市一樣有人可以搵到好工，最緊要係唔好停搵工。就算份工伏，只要人工高返啲都算過得去，畢竟香港HR好多時都只睇上份工人工，再加少少俾你。
亦有人分享，自己捱咗一年伏工，最近終於被炒，反而鬆晒一口氣，仲話「未必一個地獄轉去另一個地獄，可能下一站係天堂」。當然，亦有打工仔提醒大家轉工前要衡量清楚自己需唔需要份工生存、現實條件係點、老細同同事人品係點，唔好盲目死頂。
仲有位網民分享自己前年裸辭，雖然身邊啲人叫佢唔好咁衝動，但佢堅持自己想法，最後一個月內就搵到工。佢話：「有時未必市道差就要忍，睇你識唔識搵啫。」
依家香港打工仔喺職場上，每一步都好似踩鋼線。有工返係好事？定係應該趁早跳出嚟？真係冇一個標準答案，只可以話，了解自己要咩、捱得起幾耐，可能先搵到屬於自己嘅平衡點。
Email: advertising@jobmarket.com.hk
Email: enquiry@jobmarket.com.hk
