【廢青求職攻略】最差的見工技巧：「只被問而不發問」
每日都有人諗跳槽，每日都有人上求職網，我曾經做過HR，公司登一個post真係閒閒地一日十封CV（越好嘅公司就更多啦當然），每日十封，一個月都300封，收到電話叫你見工已經係打低咗好多對手，所以我每次出發見工都同自己講，去到一定要講多Ｄ嘢、問多Ｄ嘢，就算唔請我，最少我都要知吓間公司嘅運作，有嘢拎走先對得住自己嗰程車錢同時間！
但我必須再三強調，應徵者可以問多幾句，但重點真真係要有禮貌、尊重對方、保持微笑地問，正所謂「態度決定高度」，否則你搭車去見工都只有運吉，而無可能做到「有幾個offer喺手」。
網上圖片
睇親啲關於見工嘅文章，都係寫「求職者應該點點點讓僱主留下好印象」，呢啲文唔係無道理，不過打工同搵工其實都係雙向嘅，僱主鐘意我，都要我鐘意佢先有可能發展落去架嘛，否則我日日對住佢八個鐘咪好慘？所以我想由打工仔角度去分享見工呢回事。
係，阿僱主，我係對你個招聘廣告有興趣，所以send CV過嚟，但個廣告同事實有幾符合？大部分打工仔都心照。最少個廣告唔會寫「你有一個唔放工的上司」、「你老闆極迷信，會以時辰八字安排座位」或「你條team有個A字膊同事」等等，所以，應徵者都應該打醒十二分精神，盡量觀察清楚，令自己唔會又後悔幾年，由未過試用期就開始諗定幾時跳槽。
把握「你有無問題問我？」
Interview過程之中，對方毫不客氣將你份CV由頭問到尾，再由尾問返上頭，到最後多數都會問一句：「你有無問題問我？」老虎蟹都要答有！我會盡情問，都係嗰句，就算你唔請我，最少我都可以知多咗唔同公司嘅運作／每team分工，然後再自行分析邊啲係值得參考、邊啲係廢，第時做嘢就可以擇善從之。
網上圖片
因為調返轉頭講，好多Interviewer見人，會問叫你講解吓而家份工嘅job duties，甚至問到好細例如叫你用一個做緊嘅project為例去講你負責乜嘢、同上司點溝通、個客有咩要求而你點去解決之類，表面上係了解緊你，實際上咪又係偷學緊你公司嘅營運，佢喺你身上拎嘢走，你唔喺佢身上做返同樣嘅嘢咪好傻豬？
問咩好？
A. 「一team有幾多人？」
曾經我年少無知嘅時候入咗一間公司，見工嗰陣話平時做嘢會分幾team人去做，但我唔記得問佢公司有幾多人，我嗰team又有幾多人，因為佢講得「分幾team人去做」我就理所當然地以為有好多人，一「team」最少都應該有三個人先可以稱之為team吧？點知入到去，全公司得三個人！係呀，全公司呀！喂，邊度有幾team人去做呀？每半個人一team呀？
自此我學精了，每次見工都一定問究竟有幾多人會同我一齊捱？OT係預咗，但孤軍的感覺太痛苦，諗到夜晚OT要一個人隊杯麵就想喊啦，如果一班人一齊留夜食就唔同，一齊講粗口、又齊齊繼續做，感覺好好多的。工時長，見同事多過見老公，所以一條team嘅組合太重要。同埋真係唔好嫌自己長氣又驚自己低能而唔問清楚，任何嘢有少少疑惑都應該兜口兜面問，畢竟呢個世界太多語言偽術。
當初就係怕問太多好似好煩好chur，所以當佢同我講：「我哋而家一路請緊人，齊team會有十個八個。」我點點頭話「哦」之後就無問落去，結果咪中伏囉，入職之後先發現全公司得三個人。
網上圖片
發現伏之後我問老闆幾時請人，佢一時話未有時間、一時話未有合適人選、最後仲話請完我無哂budget請新人添（我份糧完全反映唔到比我知，我一個人點用哂公司十個八個人嘅budget），總之係騙案。自此之後我唔會輕易放過一啲咁空泛嘅答案，問你有幾多個人，十個就十個、八個就八個，「十個八個」即係十個定八個？我一定會問到底。
除此之外，見工仲有咩好問？下篇再分享。
好工推介
職場熱話
- 1
- 2
-
英國逾66％首置年輕人靠父幹 平均提供57萬 兩成子女為何後悔？
TOP 1 -
湖北29名建築工香港打工月薪3.78萬 親歷者：每天工作8小時月休9天
TOP 2 -
旅發局：菲律賓今年訪港旅客創新高 成復甦速度最快的客源市場
TOP 3 -
2025年全球最佳城市 倫敦連續10年奪冠 香港上榜排97
TOP 4 -
政府料未來3年從內地輸入1萬熟練技工 未來數月討論工種清單
TOP 5
-
中國平安推「996熬夜險」 猝死有得賠？
TOP 6 -
90後避世湧入青年養老院「慢活」 學習禪修養生叉電後重新出發
TOP 7 -
民航處招聘三級航空交通事務員 見習級月薪1.7至1.8萬
TOP 8 -
譚仔進軍澳洲 墨爾本加盟店主打「香港」品牌 餐廳設湯底櫃檯試辣
TOP 9 -
傳內地著名手機品牌 在香港拒絕招聘35歲以上員工
TOP 10
-
經民聯倡允青年以強積金置業 批「躺平」如傳染病 籲全城「抗病毒」
TOP 11 -
港人平均月儲9800元 按年增近9％創新高 需擁103萬元才有「安全感」
TOP 12 -
知識產權管理人員 未來企業人力資本
TOP 13 -
調查揭25％專業人士無意跳槽 企業招聘更審慎 僅55％僱主擬明年加薪
TOP 14 -
香港麥當勞兩年一度「遊學團」 管理層率員工赴上海參觀「漢堡大學」
TOP 15
