職趣事

近排全球掀起裁員潮，唔單止矽谷大公司撼動，就連香港人熟悉嘅銀行業都中招。繼科技巨頭微軟宣布全球裁減3%人手、約7,000人受影響後，就連本地大銀行恆生都被爆出進行裁員，部分部門削減人手高達五成，打工仔人人自危。

微軟話裁員係為咗「精簡管理架構、提升效率」，幾乎涉及公司每個部門同地區。佢哋強調，係為咗喺瞬息萬變嘅市場入面保持競爭力，做出嘅必要調整。

另一邊廂，《星島日報》引述消息指，恆生銀行自3月底派完花紅後，唔尋常地開始裁員行動，有啲部門裁員幅度高達10%至50%。更誇張嘅係，就算未被即時炒魷魚，受影響部門嘅員工都要重新申請自己原本個位，仲要同公司內外應徵者一齊競爭。雖然銀行冇講明實際裁員人數，但就話會根據市場變化，適時調整業務結構同提升員工技能。

對於突然失業，心情難免會低落。職場專家提醒大家：「唔好帶住負面情緒去搵工，唔少人喺面試時會忍唔住數落前公司，結果反而嚇親招聘官。」佢建議打工仔保持冷靜，因為而家啲公司唔只睇你有冇技術，仲好重視你有冇正面心態、情緒管理同解難能力。

同樣，有職涯導師都建議大家畀自己一段「休漁期」，好好諗清楚下一步走向。「被炒咗唔代表人生完結，反而可以趁呢個機會重新定位自己，諗吓究竟係咪想繼續原本行業，定係試吓轉去類似工種，例如由做網頁設計轉做UX/UI？又或者索性轉行，重新出發。」佢仲建議列出自己搵工時最重視嘅條件，有目標咁投CV，唔好亂咁Send。

講到底，識得保護自己權益都一樣重要。只要喺同一間公司打工夠24個月，而係因為裁員或者停工被炒，就有機會攞遣散費。如果做夠五年以上，唔係因為嚴重過失離職，亦有資格申請長期服務金。不過要注意，兩者唔可以同時攞，計算方法係以月薪嘅三分之二乘返工作年資，而遣散費要喺被解僱後3個月內申請，長服金則要喺合約完咗7日內由公司支付。

喺呢個裁員潮下，保持冷靜、識得自我調節，再加上熟識自己應有權益，就可以喺風雨中搵到屬於你嘅出路。