職趣事

物價不斷上漲，連煮餐飯都愈來愈貴，唔少市民開始反思，究竟每日親自落街買餸、返屋企煮飯係唔係真係慳到錢。近日有網民喺Threads分享自己實測，指$45買兩餸飯已經夠兩個人食，連續兩星期晚餐都靠兩餸飯，又慳錢又慳力，結果引起大量迴響。

該網民表示，自己平時買餸煮飯，去一轉街市閒閒地冇咗百幾蚊，再加上洗菜、切餸、煮嘢食、收拾清潔，真係做餐死。相比之下，落街買$45淨兩餸，再返屋企自己煲飯，兩個人食得飽之餘又唔使勞氣，如果買$90仲可以一次過食四個餸，變相更加抵食。

呢個講法引起唔少網民共鳴，有人表示買幾個番茄都要三十蚊，超市價錢一年貴過一年，自己落手煮根本唔係想像中咁經濟實惠。亦有打工仔留言，話自己放工返到屋企，街市已經收晒檔，只能靠超市有咩買咩，揀唔到材料之餘，仲要又貴又唔新鮮，令煮飯變得更加費時失事。

當然唔係所有人都對兩餸飯咁有好感。有人指出雖然價錢平，但餸菜通常炒到油淋淋、鹹到漏，長期食會影響健康。亦有人話，自己試過中環某兩餸飯舖頭，啲餸睇落簡直好似廚餘一樣，完全冇食慾。有網民更補充，話如果日日都靠重油重鹹嘅外賣餸，短期內慳咗啲錢，長遠可能要用返嚟睇醫生，得不償失。

香港人生活節奏急速，外賣兩餸飯的確為不少人提供咗方便快捷的選擇，尤其對住得遠、成日加班或者唔識煮飯嘅人嚟講，呢種平價飯盒已經唔單止係一餐，而係一種生活方式。不過選擇背後，健康、味道、時間與成本始終要自己取捨。