在職場中在公司內在辦公室裏，有甚麼最令你容易感到「葡萄」的呢？
第一位：加人工
葡萄呀指數：＊＊＊＊＊（五粒最高）
打工者十居其九，為財也，所以講錢必定失感情，別說是同一條team、同一個部門，如果第二個部門、第二間分店甚至同行有得加人工，都會令好多人成抽成抽葡萄湧出來呀。
第二位：升職
葡萄呀指數：＊＊＊＊
雖然耶穌和荀子都講過富貴如浮雲，甚麼經理主任組長頭目，不少都只是虛銜來。聽說有一家外資公司，Director的人數比看更還要多！不過，人除了貪財，就是貪名利，一旦有人升職，人們就馬上用葡萄榨汁：「佢咁廢都有得升？」、「又一個擦鞋仔」、「某某比佢有料得多，又唔見有得升」之類。
第三位：轉工
葡萄呀指數：＊＊＊
轉工都會惹人葡萄，真是天理何在！但只要你細心觀察留意注視，就會發現每當有人派散水餅，同事最經常問主角「你轉去邊呀？」，你幾曾聽過有人會問「你捨唔捨得呀？」這個又是「魚唔過塘唔肥」的思想，令人憧憬轉工=有景，當自己只有發夢的份兒，便會葡萄呀。
第四位：獲獎
葡萄呀指數：＊＊
是咁的：有間公司搞了個設計比賽給所有員工參加，結果負責搞比賽的同事經投選而奪冠，她老細即刻話「唔好啦，你身分好老尷」。講明所有員工可以參加，評選又是公平公正公開，何來尷尬呢？說穿了，就是有人有獎攞就有人葡萄了。就正如有兩個同事拍拖，舊派老細會講「公司內不宜談戀愛」，講到尾也是葡萄吧！
第五位：做老細
葡萄呀指數：＊
「呢，有個舊同事自己搞生意喎！」只要聽到這句，不由分說，大家必定起哄，因為好多人總有一個心理：明明大家都有手有腳咁高咁大，沒理由你會勁過我好多吧？所以當聽到有人自立門戶做老細，多數會八卦一番，葡萄味相對較淡，但仍然會有人酸溜溜地說「睇佢燒錢燒得幾耐」之類的「葡語」。
無論你是80後、90後定千禧後，如果你在職場上遇到甚麼新奇有趣的遭遇，不妨公諸於世跟大家分享一下兩下三下。
電郵地址：[email protected]
