職趣事

 

 

有港男分享在日本長野縣考巴士牌，經歷引來不少網民關注，他表示考慮在日本揸巴士主要為「錢」，透露日本巴士車長的日薪不俗，「巴士佬喺日本算係專業人士嚟。」

 

該位港男在連登討論區以「日本荒野大合宿、長野考巴士」為題發帖，詳細記載其在日本考巴士的經歷。

 

他表示，考完牌後，仍未決定是否留日本揸巴士，「不過考咗先，反正成世都有用。」不過，他提醒網民在日本巴士的商用車牌是不可以轉牌，「得私家車同埋電單車可以轉牌，不過都要考一個叫轉牌試，唔係咁容易，識得有個香港人考咗七次都未考到。」

 

 

總費用58萬円

 

今次到日本考巴士牌，上堂住宿加上考試，總共收費580,000円（港幣約29419元），「1 take pass都要三個星期，Total 58萬（円），唔合格就逐堂同你計，仲有住宿費。」

 

他表示，每日「要7點前返到學校，如果唔係就當遲到」，「宿舍有門禁，10點前一定要返去報到。」「日日都要返學，一日假期都冇。」

 

他表示，要在日本考巴士牌，基本條件是要識日文，「你唔識日文冇可能考得到，我諗文法要接近N1先理解到啲問題。」

 

「筆試啲問題都幾難」

 

他指：「筆試啲問題都幾難，如果冇上過堂，佢就算用中文問我，我都唔識答，何況係日文。」

 

在駕駛學校，「一共要34個鐘訓練先可以考場內試，你當一日大概三至四個鐘左右。」

 

「再學多30個鐘，先可以考路試，路試合格之後，要返去自己住嗰個市度，考多一個筆試，同埋急救證書咁樣先正式拎到個牌。」

 

日本考車牌比香港難

 

他坦言在日本考車牌比香港難，「比較過一定難香港好多，首先私家車都要考一個場內試，同埋筆試合格咗，先可以出街，日本考試呢，就有個評分標準嘅，你望少一次驚鏡做錯一樣細嘢，佢就會扣5分，扣到低過80分，佢就會叫你返去㗎。」

 

他分享自己經驗：「呢邊係要用交叉手，我成日回軚嘅時候放手，俾人Ｘ到Ｘ街。」

 

「我而家非常尊重巴士佬」

 

他說原來揸巴士要學好多知識：「我唔知香港考巴士係點樣喎，淨係場內考好多嘢㗎，V字掉頭、窄路掉頭、埋巴士站扮上落客、模擬避開障礙物、S字泊位、L泊位、11字線泊位、緊急剎車，淨係喺個場入邊已經玩10日。」

 

親身學揸巴士後，港男表示：「我而家非常尊重巴士佬，香港巴士牌係咪冇MT（牌）？個極力子都幾難踩，同平時私家車踩極力子唔同，唔係向前伸，係向下踩。」

 

港車長留言想去考個日本巴士牌

 

有本港現任巴士車長留言，問：「想去考個日本巴士牌，使唔使重新學過？」樓主回覆：「首先你要住喺日本，第二你日文要完全溝通到，第三你做嘢嘅話，要有特定簽證先可以做到，完成三個條件，你就可以重新學啦。」

 

有網民追問，如果在香港有巴士牌，到日本要唔要再考一次路試筆試？樓主回覆說：「全部都要考過，首先你要喺日本考咗私家車牌，三年後先可以考巴士。」

 

網民好奇樓主為何有興趣赴日揸巴士？樓主坦言：「係錢呀。」主要為了高收入，「我舊同學做緊做酒店前台，1個月到手先得16萬円(約港幣8128元)，做巴士佬一日（稅後）2萬円(約港幣1014元)......返一日兼職實袋2萬（円）。」

 

有網民對於日本巴士司機日薪高咁驚訝：「巴士佬咁吃香？平時公營巴士都係高人工？」

 

樓主回覆表示：「電車公司巴士佬基本稅前45萬（円）（約港幣22861元），到手都應該35（萬円）、36（萬円）（約港幣18289元），巴士佬喺日本算係專業人士嚟。」

 

有網民大表認同：「係日本搭過巴士，勁佩服司機上落車會問候，超有禮貌，巴士每次轉彎之前，司機都會講『準備轉彎啦』，仲要手車超穩......成個車程係勁smooth，好西（犀）利。」

 

資料來源：星島日報