職趣事

近年愈來愈多香港年輕人選擇「準時收工」、「唔加班」、「話辭職就辭職」，在網上引起廣泛討論。有網民於Threads發文，直言唔少00後只係唔想重蹈上一代嘅覆轍，直斥社會對年輕人嘅批評根本忽略咗背後真相。

帖文寫道：「我哋見到父母為公司打拼幾十年，結果捱出病，退休都無保障。咁做有意義咩？」發文者認為，現今好多公司要求員工「有熱誠、有承擔」，但工資連租金都唔夠，質疑「Passion可以當飯食咩？」

佢強調，00後並唔係懶惰，而係睇得通透：「人生唔應該得份工，放工先係真正屬於自己嘅生活。如果間公司值得，我哋一樣會搏命；問題係，有幾多間值得？」

相關帖文引起唔少共鳴，留言區有唔少80、90後認同：「宜家唔止00後咁諗，成個打工文化已經變咗。」有網民感慨，以前未有家庭負擔時，可以「裸辭」無後顧之憂，但依家每月支出沉重，已經唔敢輕舉妄動。

亦有網民指出，唔少人根本對自己份工無熱情，只係為生計而做：「份工唔係自己鍾意做嘅，點會有passion？」

隨住社會變遷、生活壓力與價值觀轉變，新一代打工仔女選擇以更平衡嘅方式面對職場。唔再盲目搏命，唔代表唔負責任，而係更加清楚自己想點過人生。