職趣事

 

喺職場上，做錯事唔出奇，但最折磨人嘅往往唔係他人責備，而係自己過唔到自己那關。網民分享：「返工做錯嘢，雖然冇俾人話，但都會內耗。」如果你都經常情緒內耗、懷疑自己，呢篇文教你點樣減壓、提升工作效率，逐步建立平常心應對職場挑戰。

 

職場內耗比上司鬧更傷？網民親述自責心態困擾

近日有網民喺 Threads 發文，引起一眾打工仔共鳴：「返工做錯嘢，雖然都冇真係俾人話，但都係會內耗，唔知係咪返多幾年工就可以平常心面對。」一語道破唔少上班族心聲。

 

有網民表示，自己份工經常「包底」收尾，客戶錯、上司漏，全都歸咎佢哋部門，日日都要面對無妄之災。但佢學識咗EQ生存術：「唔係自己錯，就唔理。鬧完都係要照做。」

 

另一位網民分享，入職一年內已經中伏多次，連同期都犯晒相同錯誤，情緒低落到懷疑人生。但經歷過後明白到，做嘢唔可以只靠經驗，要有分析力、邏輯性，更要有自家流程。

 

亦有人提到，三年前初入職場時被上司插爆頭，但最近一件大事中佢堅持正確做法，獲同事欣賞。佢感言：「人係會成長㗎，工做唔完，經驗永遠係屬於自己。」

 

 

6個實用建議：減少職場錯誤，遠離自責情緒內耗

 

1. 接受錯誤係成長一部分

錯唔代表失敗，而係學習過程一部分。接受錯誤、勇於改正，係成長關鍵一步。

有錯就認，唔好搵藉口

承認錯誤、主動補救，比推卸責任更能贏得同事信任。

 

2. 做事前「停一停、諗一諗」

避免低級錯誤，可以由確認資料、版本、程序開始做起。

 

3. 建立個人SOP，唔再靠記性

利用工具記錄處理流程，重複性工作標準化，減少遺漏與出錯。

 

4. 轉念思考，內省代替內耗

唔好反芻過去情緒，改為問：「今次學到咩？」、「下次點改善？」

 

5. 建立正向支援圈子

有朋友同事傾訴、互相支持，有助減壓。唔一定局限公司內，同路人同樣重要。

 

6. 練成「平常心」唔係一朝一夕

工作壓力難免，畀自己空間慢慢適應，經歷多咗，自然識得分辨大事與小事，培養穩定心態。

 

做錯事唔可怕，怕嘅係你因此停滯不前。學識面對錯誤、從中提煉經驗，配合有效情緒管理，先可以減少內耗，邁向更穩陣、自信嘅職場人生。