職趣事

不少香港媽媽都面對一個困難抉擇：係咪一定要放棄事業，先可以好好照顧小朋友？一位網民媽媽喺社交平台發帖分享，佢每日夜晚八點先返到屋企，食完飯已經筋疲力盡，連陪小朋友玩都冇氣力，更擔心幾年後要處理功課、默書、簽手冊等壓力，無奈問：「係咪一定要做全職媽媽？」

有媽媽留言分享親身經驗：「唔敢講做到事業同家庭兩得意，但生活總算平衡。」佢表示自己做輪班工作，有嫲嫲幫手照顧兩個小朋友，考試時會請假陪住溫書，家務由夫妻共同分擔，一個月請鐘點幫手大清潔，平日亦會安排時間同小朋友外出、旅行，夫妻雙方亦保留私人空間娛樂或進修。佢認為最重要係學識安排時間同懂得取捨，唔好逼自己做完美父母，家庭與自我都同樣重要。

其實，國際研究亦支持職業媽媽嘅正面影響。哈佛大學心理學家Kathleen McGinn進行跨國調查，發現來自英美等地的在職媽媽，其女兒更可能取得高學歷、高薪職位，甚至晉升管理層。在職媽媽不單止為家庭提供經濟支持，更透過身教成為女兒追求事業的榜樣。

數據顯示，有三分之一在職媽媽的女兒日後會升任主管，而全職主婦的女兒只有四分之一有此機會。同時，這些母親的兒子也更樂於接受職場性別平等觀念，更願意分擔家庭責任。雖然女兒可能花較少時間做家務，但整體照顧家庭的意願未見明顯影響。

McGinn指出，母親的就業行為傳遞咗一個重要訊息畀下一代：女性唔止可以做家庭主婦，更可以係職場上發光發熱。孩子亦因此變得更獨立，學識自理、承擔責任。

總括而言，在職媽媽無需內疚，無論選擇在家還是工作，最重要係保持平衡，做一個孩子心中有影響力的榜樣。