職趣事

日日返工放工，生活節奏急促，想搵啲屬於自己嘅時間都唔容易。不過，原來唔少打工仔反而鐘意一個人靜靜地過生活。日本最近一份調查顯示，「孤獨」唔再係負面字眼，反而成為都市人新嘅生活選擇。

根據日本《President Online》報導，日本總務省預測，到2040年，日本有接近四成住戶會係單人家庭，其中65歲以上嘅獨居長者將超過900萬戶。獨居唔再係少數，反映生活方式已經大轉變。

調查訪問咗2,336位上班族，結果有九成話自己鍾意獨處，超過一半人更加對現時自己一個人嘅時間感到滿意。雖然大部分人表示喺公司都有朋友，但無職場朋友嘅人反而話唔覺得孤單。喺工作上，效率同溝通都係重點，但對於參加聚會就意見分歧，一半人話唔太鍾意，甚至選擇唔參加。

婚姻方面，雖然有七成人已婚，九成人都對婚姻有正面評價，但接近一半人曾經諗過離婚，原因多數係興趣或價值觀唔啱。有離婚經驗嘅人中，九成都覺得離婚係正確決定；曾經經歷喪偶的人則有九成認為結婚係值得。

至於日常活動，有八成人話鍾意自己一個人去行街、睇書、食飯；雖然去唱K或去露營一個人去就比較少，但好多人都會獨自睇戲、追劇、聽歌，甚至一個人去旅行、泡溫泉都係人氣之選，享受屬於自己嘅空間。

都市人生活忙碌，識得同自己相處，可能係另一種幸福。