職趣事

職場其實是「見人講人話，見鬼講鬼話」之地，無論是同事或上司，在這個要你返工、要老闆出糧的利益場所內，你一定要眉精眼企，深度解讀對方話中有話的說話。如果你是一位純真的小薯仔，老實講，你被人「烚熟」幾次都未過到Probation。

上司問你︰「做乜做晒嘢仲留喺度唔返屋企？」你估對方讚你有歸屬感，又或者關心你？儍啦，話你知︰「上司其實暗示你平時未做哂嘢就唔好返屋企！」這種「職場語法」是將件事調番轉來講。如果遇上這情況，你應該怎樣回應？你夠醒目都知「言多必失」，點點頭，微笑一下就OK，千萬不要畫蛇添足。

網上圖片

年輕時當小薯仔，有位跟我同齡的同事，不知是否以前是校際辯論比賽冠軍隊成員，又抑或是話劇出身，上司、老闆過來單單打打，此君例必回應。好像上述的Case，他可能彈番一句︰「公司啲嘢邊會做得晒，哎呀，你唔講我醒唔起要返屋企 ！」你不要問我這位同事現況如何，因為有次公司飯局，老闆親自讚他︰「你真係香港少有人才，未見過咁有政治潛質嘅後生人，你不如諗下去選立法局議員，同『毓民』拍住上！」之後，我沒有再在公司遇到這位同事，「散水餅」都無得食。

「人生唔同階段有唔同Priorities。」畢業出來打工到你結婚之前的十年，是你打下事業基礎的黃金十年，這十年期間，你最高的Priority就是工作，盡量做好自己本身，爭取升職加薪，以達到財務自由，就可以有些少個人生活享受。不過奉勸大家，由於時代進步，公司愈來愈要求年輕化，今天你由小薯仔晉升為小頭目時，一定要有危機感，踏入三、四十歲就是公司「換血名單」中的Priority！

資料:星島日報