職趣事

 

 

 

農曆新年將至，不少已婚人士都會按傳統向未婚同事派利是。不過，近日有網民在Threads發文，直言踏入2026年，仍然收到同事派$20利是，「真心不如唔好派」，更形容自己要「交戲」回應祝賀說話，感到尷尬又疲累。帖文隨即引起熱議，留言區意見兩極。

 

 

樓主：轉個頭就用晒　仲要畀足情緒價值

該名網民表示，現時在香港食一餐午飯動輒$60至$70起跳，「你俾$20蚊我，我當然多謝你個意頭，但轉個頭去買杯嘢飲都冇咗。」他強調並非計較金額，而是覺得場面尷尬，平日與對方並不熟絡，卻要特意停下手上工作收利是，再熱情地說一句「恭喜發財、身體健康」。

 

「我要好興奮咁講祝賀說話，我覺得我個演技值錢過嗰$20。」他半開玩笑地建議，全港Office利是「公價$50起跳」，若覺得肉赤，不如請同事飲餐茶，「好過派完俾人背後笑孤寒。」最後更拋出問題：「$20利是係好意定侮辱？」

 

網民反彈：比你係人情 唔比係道理

帖文一出即引來大批網民留言，不少人直指樓主心態有問題，「嫌$20少嘅不如唔好逗，又要逗又要嫌，衰過乞衣。」亦有人從派利是的角度出發，坦言自己其實同樣尷尬：「平時唔熟，都要特登行埋嚟派$20俾你，仲要打孖上，我都好唔想。」

 

有留言更諷刺表示，看完帖文後「考慮連$20都慳返，入張紅紙寫住『恭喜發財』算」，反正總有人嫌少。亦有網民直斥樓主「唔識感恩」，認為同事賺錢辛苦，「無啦啦派$20俾你，仲要俾你上網唱。」

 

留言中亦有人借機談及利是文化。有家長表示，自小已教導子女新年收利是的基本禮儀，包括雙手接過並道謝、不可當眾拆利是、不可比較金額等。「比你係人情，唔比係道理。」他認為，利是重在祝福與分享節日氣氛，而非金額多寡。

 

 

有人坦言：人大咗反而唔太想收

不過，也有網民持較中立態度，坦言隨着年紀漸長，反而覺得收同事或街坊利是有點不好意思。有留言分享，以前住鄉村時，新年見到獨居長者派出僅$5的利是，反而覺得心酸，「嗰$5可能對佢哋嚟講已經好多錢。」認為收利是本身只是意頭，若將之視為「收入」，反而失去節日意義。

 

傳統與現實之間的落差

隨着物價上升，$20在今日的購買力確實有限，但利是作為傳統習俗，本質始終是祝福與喜氣。有人認為金額應隨時代調整，也有人堅持心意重於一切。在職場這個講求人情世故的環境，派與收之間往往牽涉微妙的社交壓力。對部分人而言是禮數，對另一些人來說卻成為負擔。