職趣事

話說公司喺Weekend搞個員工活動，每個部門都要派人參加。活動當日， #我的港女上司　盡顯佢「凡事有要求嘅一面」，去到每一個地方都要搵人投訴，而首名遭殃嘅就係旅遊巴司機。

 

港女上司一上車就大叫：「喂點解無冷氣嘅？」

 

司機大佬也不是省油的燈，我諗佢都見慣九唔搭八嘅客，司機答：

「開到咁凍都話無冷氣？女人到咗某啲年紀係怕熱，阿姐你坐低抖抖啦。」 🚬

 

司機一句中正港女上司要害，港女被激到紅都面晒 😡，佢行咗去車尾坐低，我就喺車頭第一排櫈數人頭，人齊，開車。 🚌

 

車開咗半個鐘左右，我的港女上司發作了，突然喺WhatsApp group：

 

 網上圖片

 

「個司機手車好差，詩寧，你話下佢。」 😡

（下？Why Me?你自己無口咩？）

 

我：「我都覺得佢駕駛技術一般，所以唔應該喺行車時與司機談話，保障全車人安全。」

 

港：「唔得，佢Chok到我好想嘔，你叫佢揸穩啲，同埋佢已經兜咗好耐，點解佢開車前唔睇地圖，好唔專業！」 😡

 

我：「係，架車真係好Chok，我諗我唔應該行前去，我驚企唔穩。」

（生命誠可貴，佢急停我飛出車點算呀？）

 

港：「你快啲去教佢睇地圖呀！我哋遲到喇！」 😡

 

個港女死唔斷氣，我真係膠都廢事派，無再覆佢。

 

結果一落車，港女就埋嚟大力拍我膊頭：「你即刻打去旅遊巴公司投訴個司機唔識路！」啲人話比人拍膊頭會被拍熄朵火，但我比佢大力拍一拍，個人就燥到著咗火，當時三十幾度，我地企喺一個無上蓋嘅農莊門口，我正忙緊幫同事分組、聯絡農莊負責人……拎到成手都係嘢，佢仲埋嚟叫我投訴？！

 

我：「好！我而家打電話，你拎住！」我將手上嘅Banner同一堆文件隊咗比佢，然後繼續做本來做緊嘅事。

 

網上圖片

 

港女好愕然亦好嬲：「我叫你而家即刻打去呀！ 😡問間公司做咩派個唔識路嘅司機比我哋，搞到我哋遲到，問佢哋點樣賠償，今次張單最少八折，以後Book車都要折。」

 

所有同事都望住我哋食花生，我：「無問題，但我一個人做唔晒咁多嘢，你手上份文件有旅遊巴公司Contact，你有咩要求照打去講啦。」 😊呢個時候加一個皮笑肉不笑嘅表情，我咁友善，你唔係發我爛渣卦？好多人望住架！ 🤗

 

Tips*（如果你未準備好辭職，要學懂不反面地反抗職場上嘅hihi，其中一招係笑，你一笑，佢就hi唔到落去。）

 

入到農莊，大家放低嘢，我同負責人傾緊一陣嘅安排、喺邊度影相之類（喂，公司搞呢啲係為咗影張相放Website架咋，影相位好重要），港女又衝埋嚟：

 

「詩寧，你哋傾乜嘢？快啲開始啦，好熱呀。 😡」我無望佢又無答佢。

 

佢再嚟：「呢度好多蚊呀，快啲做完走啦。」農莊負責人見我完全唔比反應，就笑住咁同港女講：「嗰邊張檯上面有幾枝蚊怕水，係我哋自製，天然架，你可以用住先。 😊」

 

港：「下，自製？我用唔慣平嘢…唉！是但啦，總之你哋快啲開始啦。 😒」

 

導賞團開始，農莊負責人介紹花草樹木，大家好專心聽，唯獨是港女喺度拍蚊，又係咁Jip Jip聲，然後佢又喺WhatsApp group：

「詩寧，呢度好多蚊！你要投訴個負責人，佢唔應該帶我哋行呢條路囉。 😡」

 

究竟喺農莊入面行邊條路會唔多蚊？

 

 

  網上圖片

 

我：「我哋行之前噴咗天然蚊怕水，無事喎。乜你無噴咩？ 🤷🏻♀️」

 

個活動個半鐘，佢就不停埋嚟同我講熱、曬、多蚊、污糟、對鞋踩到泥乜乜乜，叫我記低呢啲Point，返到公司要打封Email Send 📧返比農莊叫佢哋檢討，我忍唔住笑咗出嚟：「檢討？多蚊多泥同埋熱可以點樣檢討？ 😅」

 

佢：「你唔使幫佢哋諗，總之你記低我講嘅說話，Send出去然後叫佢哋回返一半報名費比我哋。 😡」哦！師傅，明白了，講咁多嘢原來要R refund，真係人無恥便無敵。

 

我無答佢任何嘢，只係默默同自己講，忍住忍住，下一站去餐廳食埋個Lunch，今日就完結，點知去到餐廳，發現佢除咗無恥，仲非常無賴……

 

選文：詩寧