職趣事

 

踏入30歲，有啲嘢真係要諗清楚。近日Threads有網民開帖話「想聽35-40歲大人比25歲嘅人生建議」，引嚟大批網民熱烈留言，唔少人用過來人身分，分享工作、愛情、朋友、人際同健康等層面嘅金句，真係字字珠璣。

 

金句一：錢同感情，低調最實際

「千祈唔好比人知你有幾多錢」，唔少人都強調錢要收埋，包括屋企人都唔例外；戀愛方面，有人話真正嘅愛情係穩定同平淡，「太刺激太浪漫嘅，多數唔長久」。

 

金句二：朋友關係，識得放手先長久

「大個咗會發現朋友越嚟越少，但真正嘅朋友，你有事打個電話佢會即刻出現」，有網民建議唔好借錢、唔做擔保，要識得設界線；亦有人話「同事可以做朋友，但唔好太熟」，因為人情世故難預測。

 

 

金句三：人生唔只返工放工

多位留言者指出，25歲開始要為自己健康負責，「定期做運動、注意飲食健康」、「搵個興趣減壓」、「有閒錢就去旅行」。亦有提醒，「唔好設目標話30歲前一定要達成乜嘢」、「有興趣就即刻去做，唔好等」。

 

金句四：工作要拼搏，但平衡自己嘅人生

「每人有自己條路，但千祈唔好得工作」，有網民話工作重要，但更唔可以忽略朋友、家人、健康，人生平衡先會長遠。

 

金句五：做人要有智慧，同時要識享受孤獨

「做唔到朋友都唔好做敵人」、「對人客氣啲」、「唔好戀愛腦」，更有網民話「單機唔洗怕，睇戲打邊爐獨遊都爽」人到最後，自己先係最氹到自己開心嘅人。

 

健康真係老咗先知寶貴

網民們不約而同強調身體係本錢，「唔好唔刷牙，痛起上嚟真係想死」、「儲錢買保險、食得健康、少煙少酒」，仲有人話「你以為後生用身體搏？其實係蝕緊」。

 

唔少網民感觸留言：「嗚嗚，我同緊我過去嘅自己講」、「比後生一個建議：記得日日都要做開心仔」，可見人生每一步都值得細味。